Iniciativas existentas dens lo torisme a l’entorn de la lenga nosta

Iniciativas existentas dens lo torisme a l’entorn de la lenga nosta

En 60 ans, lo nombre de toristas n’a pas deishat d’aumentar drin pertot dens lo monde.

França qu’ei uei lo dia la destinacion mei presada deus viatjadors dab ua progression de 4 % deu nombre de toristas en 2016.

A partir de l’arribada au poder deu Louis-Napoléon Bonaparte (Napoléon III) en 1848, que’s notè ua aviada economica shens precedent miant a l’amelhorança de las condicions de vita deus Francés e a la mesa en valor deu territòri e mei que mei deus país occitans. Ad aquò, que s’ei ajustat la revolucion deus transpòrts, lo desvolopament de l’automobila, los congèts pagats, entà explicar lo desvolopament rapide deu torisme tà tots. En 1955, França qu’arcuelhó cap a 20 milions de visitaires internacionaus (uei qu’èm aus entorns de 82 milions).

Lo torisme qu’a desavantatges com l’impossibilitat de mestresar las influéncias exterioras, la risca de conflictes sociaus (cambiament de las abitudas de las vilas d’arcuelh) o enqüèra los domaus hèits au patrimòni naturau e culturau.

Totun, qu’a nombrós avantatges com la creacion d’emplecs, e la diversitat e l’estabilitat de l’economia locau.

Qu’aumenta la demanda de produits alimentaris locaus e la creacion de marcats navèths taus produits artisanaus. La convervacion deu patrimòni naturau e culturau locau que hè partida deus plan·hèits totun ligats au movement toristic. Las comunas e las enterpresas toristicas que jogan suu sentit de fiertat de la region e que cèrcan a sensibilizar lo monde aus atots naturaus e culturaus.

Qu’ei lo cas au Parc nacionau deus Pirenèus qui’s situa enter los departaments de las Hautas-Pirenèas e los Pirenèus-Atlantics.

Creat en 1967, qu’ei l’un deus dètz parcs nacionaus de l’exagòne. Qu’a per tòca de preservar los sites e de protegir la fauna e la flòra miaçadas mercés a ua reglamentacion estricta. L’an passat, qu’aviè la mèrca « Esprit Parc National-Pyrénées », entà balhar un labèl de qualitat reconeishut au demiei deus professionaus deu torisme a estructuras (aubèrgaments, visitas en montanha, produits de l’artisanat, etc.) qui respèctan un còdi de bona seguida.

Uei lo dia, pas mensh de 90 actors economics deu territòri que son engatjats dab lo labèl pirenenc.

La mèrca « Tarn, còr d’Occitània » qu’estó creada dus ans a, peu Comitat Departamentau deu Torisme de Tarn.

Lo departament que pona sus la cultura e la lenga occitanas entà dinamizar l’economia territoriau en atirar los toristas. Uei, cap a 430 estructuras, de l’artisan dinc a las mairias, que son aderentas au projècte.

Lo departament de Tarn qu’a lançat ua campanha de sensibilizacion a la cultura en demostrar aus visitaires que parlan dejà un drin la lenga occitana (lo vèrb « espanter », « cramer au soleil » que vieneré deu vèrb occitan « cramar », o har « pétanque » de l’occitan « pé tancat »).

La lenga qu’ei mei anar mei cercada e emplegada dens las activitats toristicas. Los nostes amics bretons qu’avèvan vist l’importància de la preséncia de la lenga dita regionau dens l’activitat toristica despuish bèra pausa. L’Ofici de la Lenga Bretona que tien a assegurar la promocion deu breton a tots los nivèus. « tà que la lenga bretona e progresse armoniosament, que la cau enrasigar dens l’emsemble deus sectors de la societat e non l’acantonar au sol plan culturau », ce pòt léger au demiei deus objectius de l’Ofici e la soa agéncia de desvolopament.

Atau dens los país occitans, que’s pòt trobar nombrosas visitas guidadas realizadas en lenga nosta tot au long de l’annada taus toristas mes tanben taus locaus.

L’Ostau Occitan qu’organiza cada purmèr dissabte deu mes, ua visita guidada de Bordèu La Gascona per Julien Pearson, « un parcors per las arruas en cèrca d’ua lenga e d’ua cultura ». Lo musèu Joana de Labrit d’Ortès que perpausa tanben ua visita de l’istòria deu protestantisme en Bearn au sègle XVIau en lenga nosta. Charlotte Abadie-Laborde que conta en occitan cada darrèr dissabte de cada mes a 3 òras deu vrèspe.

Uas comunas que son quitament passadas a l’audioguida en occitan. Qu’ei lo cas en Peirigòrd on la « Semitour Perigord » auhereish aus visitaires la possibilitat de visitar lo castèth de Bordelha en divèrsas lengas e d’ara enlà l’occitan.
Ua iniciativa qui s’inscriu dens la dinamica actuau de promocion de las lengas regionaus lançada peu Conselh departamentau de Dordonha.

Que descobriratz dens aqueth dossièr d’OCfutura, las divèrsas iniciativas existentas dens lo torisme a l’entorn de la lenga nosta e los nombrós actors qui òbran tà las realizar e animar capvath los país occitans.